مشروع حب

شعر / سمير النجار

قط وكلب وفار
عايشين ف نكد ونقار
لا الكلب بيحب القط
ولا القط طايق الفار
والدنيا بتقسى عليهم
طحناهم ليل ونهار
فى الشغل عبيد للديب
ان شرف يوم او غار
دايس على ديلهم ديما
عايشين من غير اسرار
والتلعب مبسوط فيهم
كابس على نفس الدار
تعالو نقرب منهم
ونشوف افعال الفار
،،،،،،،،،،،،،،
القط بيقول للكلب
تعالى نعيش ف السالك
وبلاش اهوال ومهالك
عمرنا ماعرفنا الراحه
ولا صحبه ف يوم تتبارك
ليه ما نحبش بعضينا
ليه فى الهم بنتشارك
دا خناقنا ف صالح الديب
تعالى اوام نتدارك
ايدى فى ايدك نتعاهد
اسرارى مع اسرارك
ع الديب حنكون اقويه
حافظ ع دارى ودارك
رد الكلب وهوهو
يا أليف يا ابو ديل مكسور
قطعت الحشا والقلب
مين قال ان المغرور
يعرف يدوب ويحب
لا الديب حيسيبنا ف حالنا
ولا قلبى اوام هيطب
طول ما الجوع دا ورانا
و اولادنا ف غاية الغلب
نار الاسعار تهلكنا
وحوافر الديب تدب
على صدرى وصدرك ديما
وتدوس اولاد الكلب
لا القط بيحب الفار
ومين هيحب الكلب
البطن الفاضى يا صاحبى
مابتعرف معنى الحب
،،،،،،،،،
والفار ف السقف بيصوت
وبينادى بصوت سرسوع
والعقل بيقول والمنطق
الحب دا شئ مشروع
لكافة خلق الله
مين قال انه ممنوع
دا الحب يعالج دايما
جميع امراض الجوع
لو نصرخ يوم وننادى
مع بعض بصوت مسموع
اننا اصحاب واحبه
هنكون للاهل دروع
ونحافظ على اهدافنا
ضد الديب المفجوع
هيموت الديب م الخوف
دا متعالى ومخدوع
تعالو نمد ايدينا
نكسر حائط مصنوع
من وهم الماضى الغابر
من حقد مالينا دموع
دا الحب هيصلح حالنا
هو الحلم المشروع
،،،،،،،،،،
التعلب شم الحيله
واتلصص ع الاهداف
وبسرعة بلغ سيده
وسقاة من السم زعاف
الحب هيجمع بينهم
يا قائدنا كش وخاف
طول ما الناس مكبوته
مطحونه ف اكل الحاف
عايشين كارهين بعضيهم
هنكون ف امان وخفاف
قال الديب للتعلب
والحاشيه اوام يا ظراف
الرأى بكل وضوح
ثاقب وبدون اجحاف
ف السجن هنرمى الشله
الشعب اوام هيخاف
بلع لسانه الكلب
والقط دا جاله جفاف
والفار ف الجحر اتدارى
والحب دا حلم وطاف
شايفين احباب الغابه
دول ناس بجد ظراف