محمد مصلوح يكتب : أنا مش جاهل وغبي ومخبول =========================== عشان انت مصرى لازم تعانى.. وتفقد كرامتك بكل المعانى..وتحرق فى دمك سنين مش ثوانى صدق عمنا أحمد فؤاد نجم الشاعر الكبير لان هذا الشعر ليس كلام معسول او من راجل مسطول ولكنه واقع منقول ..أنا فعلا دمى محروق من سنين لانى مش شايف فى البلد اى راجل محترم يقول انه مسئول !للاسف الجهل زاد في بلدى والعقل بقى مقفول وشعبنا دائما مغلول ..لكن أكتر من كده وبيزيح ربنا مش عارف ومش فاهم هو الحاكم عايز ايه من المحكوم يحقق النهضة والتنمية والاصلاح . السلطان مش عايز كلام كتير عايزنا زى ....... ويبقى المواطن جاهل غبي مخبول لالا مش معقول ورب الكعبة حقيقى ومعقول وفي وسط الزحمة ناس بتقول يا ترى مين مسؤول ؟هههه وعلى والوجوه ذهول محدش مصدق لكن الحقيقة اننا واخدين على صوت الانين .. لينا سنين . ممكن يطلع واحد زى....... ويقولى "أنت كداب وماحدش يضحك علينا وكفاية خراب ..أحنا أعقل من كده أحنا شمس ونيل وسد" وكلام من بتاع رسائل المحمول اللى بيضحكو عليهم بيه ومش معقول تغيب الشمس ..لا فى مصر ممكن انا بقى هرد على الاستاذ اللى عامل فيها الواد المثقف المقتول بحب البلد وهقوله فاكر المعتقلين ..فاكر الجعانين فاكر المشردين ..فاكر اللي ماتو محروقين ..فاكر الغرقانين ايه مش فاكر .. ايه هو كلام الرسائل خلص من المحمول ولا انت كنت مسطول! أقولك كمان عارف الكوسة ممكن أقول لك فيها مواويل ..بلاش المناكفة و لايم نستحلفك و نسترحمك ونستعطفك ونستكرمك تفهم شوية وتشغل دماغك هتقولى نصبر ونحكم فى الاخر ده رأيك ويحترم دي حريتك الشخصية بس في النهاية لازم نعرف نفرق بين الحقائق والزيف. للاسف يطلع واحد تانى ويقولى حسبى الله ونعم الوكيل فى كل اللى عايز يخرب البلد لو الناس تشيل الغمامة من على عنيها وتقرا وتفهم كنا ارتحنا ..هقوله الله أكبر عليك عزيزى المواطن بتاع القراءة والثقافة والغمامة نتكلم شوية جد ونقولك اننا مؤمنين ان الشباب في أي مجتمع من أهم أدوات التغيير الاجتماعي والثقافي والسياسي والقيمي، وتقوم دعامة المجتمعات عليهم إذ يشكلون في أغلب الأحيان أكثر من نصف سكان الدولة. ولكن اذا كانت الجامعة بقت يا إما كباريه أو دار مسنين ..والشباب معظمهم من غير خمرة سكرانين والعلم عز علي المتعلمين ..والأساتذة بقم دجالين ..والقادة بقم طبالين..واديني في الهايف يا حبيب الملايين قصدى يا عزيزى يا مثقف يا بنى الناس المتعلمين . كمان حبة جد تانى هل تحترم القيادة السياسية فى بلدنا العظيم مصر الشباب وعقولهم واختياراتهم؟هل يحدث تبديد من الدولة فى أغلي ثرواتها وهي الثروة البشرية؟ وهل الشباب مورست عليهم صنوف مختلفة من العنف المادي والرمزي؟ خايف تجاوب بنعم دلوقتى ليه مع انك متعود عليها .. ممكن ان تصبح مصر في مصاف الدول الكبري في جميع المجالات اذا تغيرت الاجابة عن الاسئلة السابقة وأصبحت لا. لم يعد أمامنا إلا طريق واحد أن تتابع مصر تطورها كدولة تحكمها القوانين بدلا من أن تبقى دولة يحكمها الأفراد أو العائلة أو الجماعة. وفى الاخر لازم يا صاحبى تغمض عنيك.. أعقل وحب الحكومة و حب السلام وعلم ولادك يشدوا الحزام لكن أنا مابخفش وحفضل أقول كلمة حق عليها مسئول لانى مش جاهل وغبي ومخبول .